Термиз тумани “Айритом” маҳалласи ҳудудида "Indenim Textile" МЧЖ томонидан қиймати 126 млрд. 200 млн. сўм бўлган, йилига 10 минг тонна тайёр кийимлар ишлаб чиқариш қувватига эга бўлган тикув-трикотаж маҳсулотлари ишлаб чиқариш корхонаси фаолият юритмоқда.

Мазкур текстил корхонасида уч сменада иш ташкил этилиши ҳисобига Термиз шаҳри, Термиз ва Жарқўрғон туманларидан 1500 нафаргача хотин-қизларни доимий иш ўринлари билан таъминлаш режалаштирилган.

Термиз тумани ҳокимининг ўринбосари, Оила ва хотин-қизлар бўлими бошлиғи Маърифат Расулова ушбу корхонада бўлиб, ишловчи хотин-қизлар учун яратилган шарт-шароитлар билан танишди ва ишсиз хотин-қизларни ишга жалб қилиш ва бандлигини таъминлаш бўйича корхона масъуллари билан суҳбатлашди. Танишув давомида маҳаллалардан ишсиз хотин-қизлар ҳам таклиф этилиб, уларнинг бир қанчасини шу ернинг ўзтда бандлигини таъминлашга эришилди.

Шунингдек, Хотин-қизлар фаолларига корхона билан ҳамкорликда жойларда тушунтириш ишларини олиб борган ҳолда ишсиз хотин-қизларни ишга жалб қилиш бўйича кўрсатма ва тавсиялар берилди.

Маълумот ўрнида, ишга қабул қилинган хотин-қизлар, дастлаб бир ой давомида мутахассислар томонидан ўқитилади, ушбу жараёнда ҳам уларга белгиланган миқдорда ойлик тўланади. Ишга қабул қилинган хотин-қизларга эса бажарилган иш кўламига қараб 1 млн. сўмдан 1,5-2 млн. сўмгача иш ҳақи тўланади. Ишчи-ходимлар учун автобус қатнови йўлга қўйилиб, икки маҳал бепул овқат ва ўз вақтида ишга келганларга ҳар ой устама пули берилади.